Developing Resistance Against Grooming Online – Spot and Shield (DRAGON-S)

Mae Nuria yn Athro Ieithyddiaeth ac mae'n ymchwilio i fynegiant digidol. Mae Nuria yn cynnal dadansoddiadau meintiol ac ansoddol o'r tactegau cyfathrebu (iaith/yn weledol) a ddefnyddir ar gyfer camddefnydd seiberdroseddu. Mae'n arbenigo yn y tactegau a ddefnyddir at ddiben radicaleiddio ar-lein a pharatoi plant i bwrpas rhyw ar-lein. Mae gan Nuria ymroddiad diysgog i gynnig ymchwil foesegol ac arloesol y gellir ei rhoi ar waith, at wasanaeth ymdrechion ar y cyd i gadw ein plant yn ddiogel ar-lein. Mae'n dwlu ar ddysgu am ddiwylliannau ac ieithoedd eraill, teithio ac ymarfer corff.

Mae Adeline yn ymchwilydd academaidd ym maes Deallusrwydd Artiffisial a gwyddor data, gyda chefndir mewn ffiseg, cyfrifiadureg a pheirianneg. Ar ôl cwblhau PhD mewn gweledigaeth gyfrifiadurol ac ôl-ddoethuriaeth mewn dysgu peirianyddol, roedd yn ddarlithydd ymchwil ym Mhrifysgol Abertawe am gwpl o flynyddoedd, cyn symud yn ôl i Ffrainc yn 2018 i ymuno â Phrifysgol Toulon. Mae ganddi ddiddordeb arbennig mewn ymchwil amlddisgyblaethol a gwella dulliau Deallusrwydd Artiffisial drwy integreiddio gwybodaeth am ei barthau cymhwyso (e.e. ffiseg, neu ieithyddiaeth yma). Pan mae'n gadael ei chyfrifiadur, mae Adeline yn mwynhau darllen a chwarae cerddoriaeth.

Louise yw Swyddog Prosiect DRAGON-S ac mae wedi arwain prosiectau’r Brifysgol gynt mewn iechyd byd-eang gan ganolbwyntio ar anafiadau llosgi, yn ogystal â chyflwyno prosiect Ewropeaidd i dyfu microalgâu gan ddefnyddio gwastraff. Mae wedi gweithio ym Mhrifysgol Abertawe ers 2013, a chyn hynny bu Louise yn rheoli prosiectau mewn sefydliadau datblygu meddalwedd. Astudiodd ieithoedd ym Mhrifysgol Abertawe, Buses Ewropeaidd ym Mryste ac ar hyn o bryd mae’n astudio MSc mewn Seicoleg yn rhan-amser. Mae Louise yn dwlu ar wersylla, tripiau i’r traeth a chael aros yn y gwely pan fydd ei phlant yn caniatáu hynny!

Prif ffocws ymchwil Craig yw ieithyddiaeth corpws a dadansoddi disgwrs yn ogystal ag ymchwilio i ffyrdd arloesol o gyfuno’r ddau ddull. Mae ei ddiddordebau'n cynnwys disgwrs a gwaith perthynol, iaith darbwyllo a'r berthynas rhwng y personol a'r sefydliadol mewn cyd-destunau iechyd a gofal cymdeithasol. Mae Craig yn ymddiddori'n arbennig mewn ymchwil gymhwysol a all wneud gwahaniaeth cadarnhaol, yn enwedig o safbwynt bywydau grwpiau sydd o dan anfantais gymdeithasol ac sy'n agored i niwed. Mae hefyd yn hoffi ffilmiau a siarad am ffilmiau, llenyddiaeth a chomedi. 

Mae rôl Ruth Mullineux-Morgan yn y prosiect DRAGON-S yn canolbwyntio ar ddatblygu'r teclyn Shield ar gyfer gweithwyr proffesiynol ym maes diogelu plant. Hefyd, mae'n ymchwilydd doethurol blwyddyn olaf mewn Ieithyddiaeth Gymhwysol ym Mhrifysgol Abertawe, yn ymchwilio i drafodaethau plant mewn cyd-destun meithrin perthnasoedd rhywiol amhriodol ar-lein. Yn ystod y 15 mlynedd diwethaf, mae hi hefyd wedi cael gwahanol rolau uwch ym myd polisi, materion cyhoeddus ac ymgynghori yn y sector gwleidyddol a'r sector elusennau plant yng Nghymru. Mae ei diddordebau ymchwil yn canolbwyntio ar archwilio ffyrdd newydd o hybu hawliau plant a diogelu plant drwy ddadansoddiad ieithyddol. Hefyd, mae Ruth yn gwnselydd plant gwirfoddol. Yn ei hamser hamdden, fel arfer bydd Ruth yn nofio (yn aml yn y môr), yn ceisio meistroli sefydd ar badlfwrdd neu'n ymgolli mewn llyfr da gyda phaned o de.

Mae Chedza yn ymarferydd profiadol ym maes cysylltiadau cyhoeddus, y cyfryngau, a rheoli gwaith gweinyddu a chyfathrebu'r llywodraeth, o Fotswana yn ne Affrica. Ar hyn o bryd, mae'n ysgolhaig PhD y Gymanwlad ym Mhrifysgol Abertawe yn Adran y Cyfryngau a Chyfathrebu. Mae ei ymchwil yn cynnwys cyfathrebu mewn argyfyngau sefydliadol ym Motswana, ac yn archwilio'r strategaethau ymateb i argyfyngau a rôl y cyfryngau cymdeithasol wrth ddosbarthu gwybodaeth mewn argyfwng. Y tu allan i'r prosiect DRAGON-S a gwaith doethurol, mae Chedza yn mwynhau gwylio rhaglenni dogfen a sioeau realiti ar y teledu.

Mae Connor Rees yn ymchwilydd doethurol mewn Troseddeg a Chyfrifiadureg ym Mhrifysgol Abertawe, y DU. Mae ei ymchwil yn canolbwyntio ar y ffyrdd y mae grwpiau asgell dde eithafol yn defnyddio delweddau sy'n debyg i gymundodau trolio ar-lein. Er bod ei waith yn cwmpasu eithafiaeth ar-lein, mae hefyd yn cynnwys rhyngweithiadau rhwng pobl a chyfrifiaduron a moeseg a rheoleiddio Deallusrwydd Artiffisial yn yr un cylch gorchwyl.

Enillais i radd Meistr mewn Cyfrifiadureg o Brifysgol Abertawe. Roedd fy astudiaethau'n canolbwyntio ar ddysgu peirianyddol a gweld â chymorth cyfrifiadur, gan gynnwys ymchwil i geir awtomataidd a phennu ble y tynnwyd lluniau yn y Deyrnas Unedig gan ddefnyddio rhwydweithiau niwral troelliadol. Mae gen i ddiddordeb ym mhopeth sy'n ymwneud â dysgu peirianyddol a deallusrwydd artiffisial, yn enwedig os ydynt yn cael eu defnyddio i ddatrys problemau yn y byd go iawn. Y tu allan i'r gwaith, dwi'n hoffi treulio cymaint o amser â phosib yn yr awyr agored, yn enwedig wrth gymryd rhan mewn chwaraeon a mynd â'r ci am dro.

Mae Jay Morgan yn fyfyriwr yn ei flwyddyn olaf yn astudio am PhD mewn Cyfrifiadureg ym Mhrifysgol Abertawe. Mae'n gweithio i helpu i adeiladu'r systemau Deallusrwydd Artiffisial sy'n sylfaen i'r offer Shield a Spotter. Mae ymchwil Jay yn cynnwys integreiddio gwybodaeth arbenigol mewn Rhwydweithiau Niwral i wella eu galluoedd ym meysydd perfformiad a chadernid, sy'n helpu wrth gyfuno disgyblaethau ieithyddiaeth at ddiben dadansoddi iaith mewn sgyrsiau meithrin perthnasoedd amhriodol ar-lein a defnydd ymarferol Dysgu Dwfn i brosesu iaith naturiol.

Mae Keighley yn ymchwilydd doethurol mewn Ieithyddiaeth Gymhwysol ym Mhrifysgol Abertawe, lle mae'n archwilio gwaith creu hunaniaeth grwpiau asgell-dde yn y cyfryngau cymdeithasol. Cyn hyn, cwblhaodd MPhil mewn Ieithyddiaeth Gymhwysol, MA mewn Ieithyddiaeth Fforensig, TAR (PCET) a BA mewn Astudiaethau Saesneg ac Addysg. Mae diddordebau ymchwil Keighley yn cynnwys iaith y cyfryngau, trafodaethau gwleidyddol a chyfathrebu iechyd. Pan nad yw'n ymchwilio, mae'n mwynhau darllen, crosio, croesbwytho a chwarae gemau.

Mae Rosie yn ymchwilydd doethurol mewn Ieithyddiaeth Gymhwysol ym Mhrifysgol Abertawe. Mae ei hymchwil ym maes camdrin/camddefnyddio plant yn rhywiol ar-lein, gyda ffocws ar gymunedau troseddwyr ar-lein. Mae gan Rosie ddiddordeb brwd mewn gwleidyddiaeth, mae'n dwlu ar ddarllen a goflau am ei phlanhigion tŷ niferus. Hefyd, mae'n hoff iawn o ddringo, dawnsio salsa a phobi.

Mae gan Sarah radd MA mewn Cyfathrebu, Ymarfer y Cyfryngau a Chysylltiadau Cyhoeddus o Brifysgol Abertawe. Ar hyn o bryd, mae ym mlwyddyn olaf ei doethuriaeth mewn darpariaethau addysg llythrennedd digidol mewn ysgolion cynradd ac uwchradd yng Nghymru, sy'n bwnc y mae'n frwdfrydig iawn amdano. Hefyd, mae Sarah yn awdur cyhoeddedig ac yn y gorffennol gweithiodd fel ymgynghorydd Cysylltiadau Cyhoeddus a lleisydd proffesiynol.

Mae Tesni yn ymchwilydd doethurol blwyddyn olaf mewn Ieithyddiaeth Gymhwysol ym Mhrifysgol Abertawe. Mae'n archwilio sut mae pobl sy'n ddwyieithog yn Gymraeg a Saesneg yn deall ac yn creu cenedl ramadegol yn Gymraeg. Y tu allan i'r gwaith, mae Tesni yn mwynhau chwarae hoci, coginio a theithio.