YSGOLORIAETHAU MEISTR A ADDYSGIR

Rhaid i ymgeiswyr fodloni'r holl feini prawf canlynol i gael eu hystyried yn gymwys i gyflwyno cais am Ysgoloriaeth Noddfa Prifysgol Abertawe.

Mae un o'r canlynol yn berthnasol i chi:

• Rydych chi'n Unigolyn sy'n Ceisio Lloches yn y DU
• Rhoddwyd caniatâd i chi aros yn y DU ar sail disgresiwn neu Ddiogelwch Dyngarol
• Rydych chi'n bartner/ddibynnydd wedi'ch cynnwys ar gais ceisiwr lloches yn y DU

Sylwer: Rhaid bod partneriaid priod/sifil yn bartneriaid priod/sifil ar y dyddiad y gwneir cais am loches. Rhaid bod oed plant/llys-blant yn iau na 18 oed ar y dyddiad y gwneir cais am loches.

AC

• Mae gennych gynnig amodol neu ddiamod gan Brifysgol Abertawe am fynediad ym mis Medi 2022 i gwrs gradd Meistr Ôl-raddedig a Addysgir.
• Rydych chi'n bodloni’r gofynion IELTS sylfaenol sy'n gysylltiedig â'ch cynnig am le ar y cwrs, a holl amodau eraill eich cynnig, ac rydych chi'n cytuno i ymgymryd â phrawf SWELTS i bennu’ch statws IELTS fel rhan o'r broses cyflwyno cais, os bydd angen.
• Rydych chi wedi cael eich asesu gan Dîm Derbyn y Brifysgol fel rhywun sy'n ceisio lloches ac felly ystyrir eich bod yn fyfyriwr rhyngwladol.
• Rydych chi wedi cael eich asesu gan Dîm Cydymffurfiaeth a MyfyrwyrRhyngwladol@BywydCampws fel ceisiwr lloches â’r hawl i astudio yn y DU
• Rydych chi'n mynychu ysgol, coleg neu grŵp cymunedol neu wirfoddol ar hyn o bryd sy’n gallu rhoi geirda i gefnogi eich cais
• Rydych chi'n byw o fewn pellter addas i allu deithio’n ddidrafferth i'r Brifysgol (mae tocyn bws Bae Abertawe yn rhan o ddyfarniad yr ysgoloriaeth).
• Nid oes angen cymorth arnoch chi ar gyfer costau llety a chynhaliaeth.

Rhaid i ymgeiswyr fodloni POB UN o'r meini prawf cymhwysedd caeth hyn a bod mewn sefyllfa i brofi eu hamgylchiadau er mwyn cyflwyno cais cyn y dyddiad cau sef 4pm ddydd Iau 30 Mehefin 2022. Ni chaiff ymgeiswyr nad ydynt yn bodloni'r holl feini prawf eu hystyried yn gymwys am yr ysgoloriaeth. Anogir ymgeiswyr nad ydynt yn sicr o'u cymhwysedd i gysylltu â SanctuaryScholarship@abertawe.ac.uk am gyngor pellach.

Mae rhaglen Meistr Ôl-raddedig a Addysgir gymwys yn radd amser llawn neu ran-amser sy'n arwain at gymhwyster MA/MSc/LLM. Mae deiliaid cynigion ar y rhaglenni gradd canlynol yn gymwys i gyflwyno cais am yr Ysgoloriaeth Noddfa:

• Rhaglenni meistr a addysgir amser llawn.
• Rhaglenni meistr a addysgir rhan-amser (yn achos rhaglenni rhan-amser, cynigir cymorth ariannol ar sail pro rata).

*Sylwer nad yw rhaglenni gradd Meistr a noddir gan y GIG yn gymwys, gan gynnwys Nyrsio, Gwyddor Gofal Iechyd a Meddygaeth. Nid yw cyrsiau sy'n cynnwys teithio dramor a/neu leoliadau gwaith yn gymwys. Darllenwch yr Telerau ac Amodau Ysgoloriaeth Noddfa am ragor o wybodaeth am raglenni cymwys.

Mae'r ysgoloriaeth hon yn talu cost lawn ffïoedd dysgu.

Bydd arian ychwanegol ar gael ar gyfer costau sy'n gysylltiedig â’r cwrs, megis teithio i'r Brifysgol ac oddi yno, costau cynhaliaeth, offer digidol a llyfrau.*

*Sylwer na fydd y taliad ar ffurf arian parod. Caiff y taliad ei wneud ar ffurf tocynnau bysus, cardiau arlwyo'r Brifysgol, offer, etc.

Yn gyntaf, bydd angen i chi feddu ar gynnig amodol neu ddiamod i astudio ym Mhrifysgol Abertawe ar gwrs meistr perthnasol. Mae Future Learn yn darparu cwrs ar-lein am ddim i helpu ceiswyr lloches drwy'r broses cyflwyno cais i brifysgolion y DU.

Rhaid i ymgeiswyr gyflwyno cais cyn y dyddiad cau, sef 4pm ddydd Iau 30 Mehefin 2022. Dylech ddarllen Nodiadau Cyfarwyddyd Cais am Ysgoloriaeth Noddfa cyn cwblhau eich cais.

I gyflwyno cais, cwblhewch a chyflwyno'r canlynol i SanctuaryScholarship@abertawe.ac.uk:

• Ffurflen Gais Ysgoloriaeth Noddfa
• Datganiad personol
• Copi o'ch llythyr cynnig gan Brifysgol Abertawe
• Llythyr geirda gan rywun â pharch yn y gymuned sy'n ymwybodol o'ch amgylchiadau ac sy'n gallu cadarnhau eich addasrwydd i astudio gradd Meistr Ôl-raddedig a Addysgir (er enghraifft, athro neu hen athro, aelod o grŵp cymunedol neu sefydliad sydd wedi bod yn eich cefnogi, etc).
• Tystiolaeth o'ch statws mewnfudo presennol/disgwyliedig*

(Gweler y Ffurflen Gais Ysgoloriaeth Noddfa).

*Mae cymhwysedd i gyflwyno cais am yr ysgoloriaeth yn amodol ar gael cadarnhad llwyddiannus o statws mewnfudo'r myfyriwr ar adeg y cais, a bydd yn rhaid i dderbynnydd llwyddiannus yr ysgoloriaeth ail-gadarnhau ei statws mewnfudo cyn cofrestru ar ei radd Meistr Ôl-raddedig a Addysgir.

Bydd ymgeiswyr yn cael gwybod a yw eu cais yn bodloni'r meini prawf cymhwyso o fewn 10 niwrnod i'r dyddiad cau terfynol, sef 30 Mehefin 2022.

Ar ôl eu cymeradwyo, caiff ceisiadau eu hanfon i'w hasesu gan Banel Adolygu’r Ysgoloriaeth Noddfa. Efallai y bydd yn rhaid i ymgeiswyr ddod i gyfweliad, i'w gynnal ym mis Gorffennaf 2022.

Bydd ymgeiswyr llwyddiannus am yr ysgoloriaeth yn cael eu hysbysu am y dyfarniad erbyn 1 Medi 2022.

Sylwer mai proses gystadleuol yw hon, ac o ganlyniad, ni fydd yr holl geisiadau'n llwyddiannus. Mae gan bob myfyriwr yr hawl i apelio yn erbyn penderfyniadau a wneir ynghylch ei gymhwysedd i gyflwyno cais am yr Ysgoloriaeth Noddfa – e-bostiwch SanctuaryScholarship@abertawe.ac.uk am ragor o fanylion. Rhaid cyflwyno apeliadau o fewn 3 diwrnod gwaith i’r cais gael ei wrthod, a rhaid cynnwys tystiolaeth ategol berthnasol.

Sylwer mai penderfyniadau terfynol yw'r rhai a wneir gan Dimoedd Cydymffurfiaeth a MyfyrwyrRhyngwladol@BywydCampws y Brifysgol ynghylch statws mewnfudo myfyrwyr a'u hawl i astudio yn y DU, oni bai y gallwch chi ddarparu tystiolaeth newydd mewn perthynas â'ch hawl gyfreithiol bresennol i aros ac astudio yn y DU.

• Os oes gennych ymholiadau am y broses cyflwyno cais am yr Ysgoloriaeth Noddfa, neu os oes angen rhagor o wybodaeth arnoch, cysylltwch â thîm Arian@BywydCampws yn SanctuaryScholarship@abertawe.ac.uk.
• Os oes gennych ymholiadau am gyflwyno cais am gwrs, cysylltwch â'r Tîm Derbyn: admissions@abertawe.ac.uk.
• I holi am statws mewnfudo, neu am gymhwysedd i astudio fel ceisiwr lloches, cysylltwch â thîm MyfyrwyrRhyngwladol@BywydCampws: international.campuslife@swansea.ac.uk. 
• Os oes gennych ymholiadau am sgorau IELTS, cysylltwch â thîm y Gwasanaeth Hyfforddiant Iaith Saesneg elts@swansea.ac.uk. 

Cynigir ysgoloriaethau a bwrsariaethau Prifysgol Abertawe ar sail y ffaith y gallant newid. Yn ogystal mae'r Brifysgol yn cadw'r hawl i gyfyngu ar nifer yr ysgoloriaethau a'r bwrsariaethau sydd ar gael.

Rhaid derbyn ceisiadau erbyn y dyddiad cau, sef 4pm ddydd Iau 30 Mehefin 2022.